Selena Gomez-i'n music chawlhsan a tum

Selena Gomez chuan music lam chawlhsan a, acting lama insawrbing chhoh a tum.

Disney star hlui hian 'Smartless' podcast episode hnuhnung bera a inlan ṭumin, a album tihchhuah tura album hnuhnung ber tur a nih tawh maithei tih a sawi. Kum 31 mi, 'Only Murders In the Building' actress hian a album tihchhuah hnuhnung ber chu kum 2020 daih tawh kha a ni. "Music siam a, tour neihte chu a nuamin a hlimawm hle. Mahse tunah chuan TV show (Wizards of Waverly Place) ka neih mek hi nuam ka tiin, hei hi chhunzawm zel kan duh a ni. Kan upa chho zel a, insawhnghehna tur eng emaw ka ngai tawh. Album pakhat siam tur chu ka la ngaiin ka hria a, mahse, thlan tur ni se lemchan hi ka thlang ang," tiin a sawi. "Actress nih hi ka chak a ni a, full time singer nih hi ka tum ngai lo. Zaithiam ber pawh ka ni lo a, mahse, hla siam hi chu nuam ka ti hle a ni," a ti.

Selena Gomez hi a bul ṭanna pawh child actress niin, naupang TV series 'Barney & Friends; (2002-2004)-ah a chang a, Disney Channel sitcom 'Wizards of Waverly Place' aṭangin a lar chho a ni. A hnuah pop rock band Selena Gomez & the Scene angin studio album pathum a tichhuak a, kum 2013-ah solo album 'Stars Dance' tichhuakin, a hnuah 'Revival' leh a album hnuhnung ber 'Rare' te a tichhuak leh bawk. Nikum December thla khan a fan-te hnenah a album thar chu thla hnih hnu velah a chhuah tur thu a sawi.