'The First Omen' teaser trailer hmasa ber ti chhuak

1976 horror classic,'The Omen' prequel teaser trailer hmasa ber chu 20th Century Studios chuan a tichhuak a, he footage-ah hian Rome-a Antichrist rawn pian chhoh dan plot a rawn lang.

'The First Omen'-ah hian Nell Tiger Free chu Margaret lemah a chang a, a tunhma nunte flashback-in lantir a ni. Bill Nighy chu puithiamah a chang bawk. Anni bakah psychological thriller-ah hian Tawfeek Barhom, Sonia Braga leh Ralph Ineson-te pawh an chang a, a script hi Arkasha Stevenson, Tim Smith leh Keith Thomas-te ziah a ni. Stevenson hi director ni bawkin, film a direct-na hmasa ber a ni. Hetih lai hian horror anthology series, Channel Zero episode pasarih erawh a lo direct tawh thung.

Phantom Four label hnuaiah David S.Goyer, Keith Levine leh Gracie Wheelan-te chu producer an ni dawn bawk. Kumin April 5-a tihchhuah tum a ni. Nikum lamah box office lamah horror movie-te an che ṭha thawkhat a, hei vang hian 'The First Omen' siamtute pawh hian beiseina an neih san hle rin a ni. Hei bakah April 5 kara film tlangzarh tur puan chhuah awmchhun a la ni bawk.