Golden Globes 2024: 'Oppenheimer' a langsar ber

81st Golden Globe Awards chu India ram huna Thawhṭanni zingah khan sem a ni a, 'Oppenheimer' chu award dawng tam ber a ni.

Nikum lama boruak nei lian film pahnih,'Oppenheimer' leh 'Barbie' hian nomination hmu hnem berin, pakua ve ve an hmu a, biographical thriler 'Oppenheimer' hian award panga lain, heng zingah hian award ngaihhlut 'Best Picture (Drama)' award pawh a tel a, director Christopher Nolan pawh best director-ah thlan a ni bawk. 'Barbie' erawh chuan award pahnih chauh a la ve thung. Khawvel pum huapa USD tld 1.4 chuang la lut thei film hian box office achievement award a la tel. Mi tam takin Barbie film-in a lak an lo rin, Best Picture (Musical or Comedy) chu 'Poor Things' in a la ta zawk.

'Oppenheimer' lead actor Cillian Murphy chu Best Male Actor (Drama)-ah thlan niin, a co-star Robert Downey Jr. pawh Best Supporting Male Actor-ah thlan a ni bawk. Best Actress (Drama) chu 'Killers of the Flower Moon' changtu Lily Gladstone-in a la.

Award pahnih la thei hi 'Anatomy of a Fall', 'The Holdovers' leh 'Poor Things' te an awm bawk a ni.

TV department lamah HBO "Succession" che ṭha berin award pali a la. "Succession" star Sarah Snook chuan Best Performance by an Actress in a Television Series - Drama award a dawng. Best Performance by an Actor in a Television Series - Drama award chu Kieran Culkin-a'n a la ve bawk. FX "The Bear" chuan award ngaihhlut, Best Television Series - Musical or Comedy a dawng bawk. Netflix series,'Beef' chu Best Limited Series, Anthology Series or Television Motion Picture-ah thlan a ni.

Show hi Jo Koy-a'n a host a, presenter zingah hian Jared Leto, Angela Bassett, Matt Damon, Ben Affleck, Natalie Portman, Florence Pugh leh Oprah Winfrey-te an tel.