2023-ah Bollywood box office-ah Rs. vbc 4500 chuang hmu chhuak

Kum 2023 chhunga Bollywoo film hrang hrang aṭanga sum hmuh chhuah chu Rs. vbc 4,500 chuang a tling. Rs. vbc 500 chuang la lut thei film hi paruk an awm a, heng zinga pahnih chu Shah Rukh Khan channa te an ni. 'Pathaan' chuan Rs. vbc 1,000 chuang la lutin, SRK channa film hrang hrangte'n kum 2023 chhunga an sum lak luh hi Rs. vbc 2,600 a tling.

Covid-19 hripui leng avanga film industry lamin harsatna an tawhte a reh tawh a, ngai awh chho leh tawhin theatre hrang hrang an lun chho leh tawh hle.

Producer leh film business expert, Girish Johar chuan nikum chhunga film industry lam performance chu a lungawithlak hle niin a sawi a,"Indian box office tan 2023 chu kum duhawm tak a ni. Hripui len hnuah industry pawh a rawn 'comeback' leh thei ta," a ti.

Kum a thar chauh na a, star lar tak tak channa film tlangzarh tur hmachhawp pawh a awm nghal nual. Tlangzarh hun tur tihchian tawh film 34 zet awmin, heng zingah hian Akshay Kumar, Ajay Devgan, Alia Bhatt, Deepika Padukone leh Kartik Aaryan channate pawh an tel.