Box Office: Kum tharah 'Wonka' in ro a rel chhunzawm

North American box office-ah 'Wonka' chuan no. 1 ni chungin kum 2023 a khar hnuah, kum 2024 chawlhkar hmasa berah pawh ro a rel chhunzawm zel.

Paul King-a musical fantasy film hian chart chung ber dinhmun hi ṭum thum a luah thei ta. A kar linaah hian North America-ah USD mtd 14.4 hmuh chhuah belhin a sum hmuh hi USD mtd 164.6 a tling tawh a, khawvel pumah USD mtd 465.8 a la lut tawh bawk. USD mtd 125 budget hmanga siam, Timothee Chalamet channa film hian critics leh audience lamah pawh rating a hmu ṭha viau a, Rotten Tomatoes-ah 7.3/10 hmuin, CinemaScore-ah grade 'A-'an hmu bawk.

No. 2-ah kumina film release langsar tham la awmchhun, 'Night Swim' awmin, he horror film hi Jason Blum leh James Wan-te siam a ni a, budget USD mtd 15 niin, tlangzarh karah USD mtd 12 a hmu chhuak a ni. Rating erawh a hmu ṭha viau lo a, Rotten Tomotoes-ah 4.4/10 hmuin, audience lam aṭang pawhin 'C' grade chauh a hmu pha bawk. 'Aquaman and the Lost Kingdom' chuan USD mtd 10.6 hmuh belhin no. 3-ah a awm a, 'Migration' pawh no. 4-ah tla thlain USD mtd 10.3 a la lut a, Top 5 chu USD mtd 9.5 la luttu 'Anyone But You' in a khar.

Kum dang ang bawkin, 2024 thla hmasa berah chuan box office lam boruak a dai a, kuminah hian nikum kum tir lai aiin sum lakluh pawh 16% velin a tlahniam a ni.