Nextg esports tournament season 2 neih a ni dawn

NextG Esports leh Mizoram E-Sports Organisation ṭangkawpin an buatsaih, NextG Esports Tournament Season 2 Lan events chu R. Dengṭhuama Hall, Mualpuiah neih a ni leh dawn ta.

He Tournament hi November 6, 2023 aṭang khan online-a khelh ṭan niin, Battle Ground Mobile India (BGMI) leh Mobile Legends : Bang Bang hmanga inelna neih a ni a, Lan Event hi a hmawrbawkna tur niin, ni thum chhung neih tur a ni. Vawiin chawhma dar 11-ah Lan Event Opening Ceremony hi neih tur a ni a, organizer leh players inhmelhriattirna neih zawh hnuah match ṭan nghal tur a ni ang. Day 1-ah hian BGMI Match 5 leh MLBB Match 10 en tur a awm nghal dawn. January 12, 2024, Zirtawpniah chhunzawm a ni ang a, Grand Finale hi January 13, 2024, Inrinniah neih tur a ni ang. Tournament prizepool hi Rs. 3,00,000/- zet a ni.

Grand Finale hi Cosplay leh zaithiam hrang hrang te nen khar tur a ni dawn a, a hmuna en thei lo tan NextGshow Youtube Channel-ah Live-a pekchhuah a ni bawk ang. Season 1 hi kum 2022 khan Chanmari YMA hall-ah cosplay-te nen hlawhtling taka neih a lo ni tawh bawk a ni.