2024 Golden Globe rating 50% in a sang; 2020 hnuah show thlirtu an tam ber ṭum

2024 Golden Globe Awards, Thawhṭanni zinga neih chuan thlirtu mtd 9.4 neiin, nikum aiin viewer hi 50% zetin an tam.

Comedian Jo Koy-a host-na hnuaiah, Globes hi Paramount+ leh CBS platform hnuaiah, kum 2023 February-a 65th annual Grammy Awards neih hnuah award show livestreaming audience ngah ber a ni leh thei ta. Kum 2020 hnua Golden Globe show thlirtu an tam ber ṭum a ni bawk.

Kum 2020 khan show viewer hi mtd 18.32 an tling pha a, mahse, a kum leh 2021 khan viewer hi mtd 6.91-ah a tla thla. TBS aṭanga NBC-a an insawn hnua show viewer an tlem ber ṭum a ni nghal. Kum 2022 khan TV leh streaming lamah pe chhuak loin, private dinner angin kalpui a ni a, nikum khan show hi neih leh a ni a, viewer mtd 6.3 an awm. Kum 1944 aṭanga kalpui ṭan, he show hian ngaihven a hlawh lo zel dawn nia ngaih a nih laiin, kuminah CBS-ah insawnin thlirtu an rawn pung chho leh ta a ni.