No.1-ah The SpongeBob Movie: Sponge On The Run

Box Office chart-ah 'The SpongeBob Movie: Sponge On The Run' chuan sum a lalut tam ber a, 'Unhinged' chu pahnihna niin 'The Tax Collector' chu pathumna a ni.

Computer animated adven­ture comedy movie The SpongeBob Movie pathumna 'The SpongeBob Movie: Sponge On The Run' chu Zirtawpni liam ta khan Canada leh US-ah tlangzarh niin theatre 300 aṭangin $865,824 a lalut a, kar tawp liam taa sum lalut tam ber a ni.

SpongeBob hi chu mi tam takin an hmelhriat tawh a rin­awm a, movie hmasa ber 'The SpongeBob SquarePants Movie' kha kum 2004-a tlang­zarh niin $maktaduai 141.1 lai a lalut thei a, kum 2015-a a movie pahnihna tihchhuah 'The SpongeBob Movie: Sponge Out of Water' khan $mtd 325.2 lai a lalut leh bawk. 

Hetiang a nih avang hian 'The SpongeBob Movie: Sponge On The Run' pawh hi beiseina sang tak nen an siam tih a hriat a, film siamna atana an budget pawh hi a sang hle a $mtd 60 lai a ni. Mahse hripui leng vangin an beisei ang zat sum an lalut thei dawn lo tih a chiang a, sum lalut tam ber ni mah se a sum lakluh hi an budget ngaihtuah chuan a beitham hle a, mahse Netflix lamah pawh en theih turin an la dah dawn niawm tak a ni a, sum eng emaw zat chu an lalut leh thei dawn thung. North America-ah chiah hian an la tlangzarh a, ramdangah an la tlangzarh lo a ni.

Russell Crowe channa thriller film 'Unhinged' chu Zirtawpni liam ta khan US-ah tlangzarh a ni a, theatre 299 aṭangin $601,032 lalutin sum lalut tam ber dawttu a ni.

'Unhinged' hi July 16 khan Germany-ah chuan tlangzarh a ni daih tawh a, hemi vang hian sum pawh a lalut nual tawh a, ram hrang hrang box office aṭanga a sum lakluh nena belhkhawm chuan $3,784,368 lai a lalut ve tawh a, hetichung hian film an siamna budget chu a la pha lo hle tho.

Chart hmasaa pakhatna 'The Tax Collector' chu pathumna a ni ve ta a, 'The Rental' chu pahnihna niin 'Peninsula' chu pangana a ni bawk.

Box Office-ah hian sum che vel la tlem hle mah se kartinin a pung ve tual tual a, theatre pawh kar hmasa nena khaikhin chuan an hawng ve tam ve sawt hle. Top 10-a lang ṭhenkhat erawh hi chu theatre pathum leka chhuah te pawh a la awm a, US Box Office chart tarlang ṭhintu Box Office Mojo chuan film 25 chiah chart-ah an la tarchhuak bawk a ni.

1    The SpongeBob Movie: Sponge On The Run    $865,824

2    Unhinged    $601,032

3    The Tax Collector    $182,105

4    The Rental    $93,618

5    Peninsula    $79,206

6    The Big Ugly    $22,255

7    Made in Italy    $20,680

8    Spree    $20,480

9    American Deep State    $15,269

10    The Burnt Orange Heresy    $13,529