Grace Lalchhanhimi hla thar a hnai

Mizo Idol hmeichhe hmasa ber Grace Lalchhanhimi chuan music video thar a peihfel leh der tawh a, Zonet cable TV lamah kan thlirin kan ngaithla thei thuai dawn.

Grace-i hla thar hi 'Ka Chanchin' tih a ni dawn a, Pensy leh zaithiam dang eng emaw zat music lo siam sak fo tawhtu Blue wave records chuan video leh audio hi an buaipui vek a, an kut chhuak a mawi ṭhin bawk a, a ngaihthlak tlak leh hle ang.

Mizo Idol a nih piah lama Ṭhazual fakna chart-a che ṭha ṭhin tak Grace-i hla thar tur ' Ka Chanchin' tih hi worship song a ni a, "A hla hi ka duh em em a, min hneh em em bawk. Video pawh hi hun chep tak karah kan shoot a ni," tiin Grace-i chuan a sawi.

Pathian chu kan chanchin engkim hre tu, kan nun engkim hre tu ni chunga min la hmangaih rengtu a nihzia tarlanna hla ṭha tak a ni a, TV lama en hman lo tan pawh YouTube lamah a awm thuai dawn a ni.

Tunah hian hla dang buaipui lai mek a nei bawk a, chu chu a nau phuah a ni nghe nghe a, thla leh tawp lamah hi chuan peihfel hman a tum bawk.