Sudden Muanga Film a chhuak ta!
Mizo ṭawnga fiamthubu (Comics) chhuak zinga upa ber pawl, chhiar manhla, awm ze ril leh thuk, ngaihnawm leh hlimawm bawk si, 'Sudden Muanga' thawnthu chu Champhai nula leh tlangval ten lemchan khawvelah an rawn vawrh chhuak ta.
K’u Muanga thawnthu hi L.T. Muana Khiangte chuan hlaah a chantir a, zaithiam lar Zira Hnamte-in “Sudden Muanga hla” hi radio-ah a lo thun tawh. A thawnthuin a zir bawka Sudden Muanga Hla hian Zoram khawvel a deng chhuak hneh hle a nih kha - tunah a film ve thung!
Sudden Muanga film hi March 28 khan Vanapa Hall-ah C Lalṭanpuia, Mosia Agency neitu chuan a tlangzarh a. Director cum Producer, B Rosangzuala, Champhai Kanan chuan mipuite lei theih turin an zuar chhuak dawn rih lo tih a sawi.
Aizawl veng hrang hrangah YMA leh pawl dangin Sudden Muanga film hi sum tuak nan an hmang dawn a, veng pakua nen show neiturin inremna an siam tawh tih Director chuan a sawi.
Champhai Tlangsam aṭangin Ṭiau kanin Bukphir khua (Burma) ah an chang a. Bukphir hi Champhai aṭanga darkar 3 vel kal a ni. Bukphir ah hian chawlhkar khat chamin an chang a, a dang hi hmun dangah an chan chhunzawm leh a ni. Chawlhkar li chhungin an peihfel tih Director chuan a sawi.
Director B.Rosangzuala hi Sudden Muanga ziaktu Lal-sangzuala (Laisaizawks) hmu turin Manipur-ah a zin a, phalna a la. A bu ang diak diaka chan dawn chuan rei a daih dawn loh avangin a story phuah belh phalna a dil a a; Sudden Muanga comics neitu Laisaizawks phalna ngeiin a ‘story’ a phuahbelh tih a sawi.
Director sawi danin a channa leh vahvelna zawng zawng nen hian cheng nuai li dawn an seng. Sudden Muanga, Hrangeka, Kiauva leh an chekawite hman tur pistol hi an zawng nasa hle a, Silchar thlengin an zawng tih Director chuan a sawi. An duh ang pistol lem an hmuh theih loh vangin Champhaiah silai chher thiam an ruai a, pistol pakhat atan Rs 2000 zel an seng hial a ni. A tak ang thei ber tur, tho-kep chep puak thei tur an duangchhuak tih a sawi.
Sudden Muanga film hi chhuah chhunzawm zel tur (episode) a nih dawn avangin chan leh huna hman turin Sakawr tawlailir ṭha tawk tak an siam tir mek bawk.
Sudden Muanga comics hi Lalsang-zuala (Laisaizawks), Churachandpur khawpuia cheng ziah niin, a hunlai chuan Zoram khawvel dengchhuaktu, khawlai titi tling. A changtute hming a dangdai a, hriat a awl mai bakah ṭawngkam bungrua an ngah em avangin Zoram mipuite ngaihzawn rawn a ni. A lem nena tihchhuah a nih avangin khabe dawh tak, hmuihmul zum tak, hnar ṭawk leh ria zaih mai Sudden Muanga chu mitin hmelhriat a ni.
Ani bakah Hrangeka, Judy Ṭhiaii, Kiauva, Mary leh a saloon te, Hleizuama, nula duhawm Linda Hermawii te, Tumsangi te, sheriff pahnih — Abraham Chalchhuna leh Pu Kapa te, Darringaia te, Pastor Gospelliana te, zu zuar Pi Dari te, Shabito leh Apache hote ngaihtuahna mitthla an luah reng ṭhin a nih kha. Sudden Muanga thawnthuah khan Zoram Khawvel politics inlumlet dan leh mipui nawlpui sukthlek milin fiamthu ngaihnawm tak kan hmu chho zel a ni.
Hmunkhawhar City aṭangin Khawnuam city leh Rualrem city te chu K'u Muanga chettlatna hmun a ni a. Hrangeka nen kohhrana an inhnimphum hnuah Holy War an tichhuak a nih kha, van lawn kawr te pawh kan la hre hlawm awm e!
K'u Muanga Ṭawngkam dangdai zualte:
"Kan pi leh puten Zawlaidi an lo tih kha Pawisa hi a lo ni reng a lawm mawle," "Tunlai nulate chuan figure nalh, pawisa nei si lo hi chu enga tan mah an ti lo," "Sawlai lang lo liama Laiking nilum ai saw kan kap fuh chat ang e," tih leh a dang a va tam em!
Film Review
B Rosangzuala kutchhuak hma-sa ber Sudden Muanga film hi darkar khat leh minute 20 vela sei a ni.
He film-a lang hmasa ber chu Sawhthing Milianaire Sudden Muanga'n sawhthing ip a thiar lai a ni. K'u Muanga chu Sawhthing ip intiang khawm nghengin a ṭhu chawl a, Ketli aṭanga thingpui sen hang thli chhuakin a in nghal a. A dawt chiah scene ah hian nula rim turin a insiam a, tichuan a sakawr chuam "Daii" chungah ngei chuangin, 'Hmunkhawhar City' a lut chhak chhak a.
Hmunkhawhar City lunlaia Mary Saloon ah lut nghalin, a man tlawm "Piangthar zu" (Beer) a khiat a, Sawhthing a la hralh loh vangin sum a nei lo a ni. Kiauva nen intibuaiin, Kiauva leh a hoten Saloon aṭangin an thehchhuaka, dawl zawra zawrin Sawhthing hmun lam a pan leh hnak hnak a. K'u Muanga ngaina tan chuan film hi en ngei chi a ni ang.
Film-a inbiakna hi trailer-a mi ang lo khan a hranpain an ṭawng hi record ṭhat (dubbed) vek a ni. Cowboy film anih avangin an ṭawng muang lui deuh tih Director chuan a sawi. Amaherawh chu, inbiakna (dialogue) hi inngaichang lutuka ṭawng a an deuh hlek avangin a fuh chiah lo niin a lang. Director chuan episode lehah chuan dubbing hi Aizawlah vek tih a ni ang a ti.
Sound effect a ṭha a, K'u Muang-a'n silai kah a zir laia sound effect pawh a fuh thlawt. Background music pawh a fuh angreng viau. In chhung aṭanga pawnlam a lan changin eng mah mah (over-exposed) a awm zeuh zeuh. Saloon chhung leh K'u Muanga chetla hrim hrimah awma chin chunglam (medium shot) a tam deuh hlek niin a lang.
A channa hmun hmain a zir a, Saloon chhunga zu um intlar ṭhat mai te, a bang thing vek te pawh a inmil viau e.
Lemchan (acting) pawh a ṭha hle; K'u Muanga rawn intuaithar hnua Kiauva nen Mary Saloon-a an in draw pawh a nalh dang dai hle. "Pistol te lek lek chu.. phawi saa pai mai tur" tiin Kiauva tlanchhia chu a kah chhilh zui!
A tawp lama Hrangeka nen Mary Saloon chhunga an inhmachhawn pawh a ropui e; Sudden Muanga pistol phawi ran zia kha! El Paso kawtthlera cowboy in draw ang maia hmuhnawm a ni. Hrangeka kid pakhat silai lo chuh ve ngawt a tukzal dan aṭang khan pistol chelek ṭhang tih a chiang viau a ni...
Sudden Muanga, in the beginning
A changtute:
Sudden Muanga - Vanlalchhuana, Champhai Kanan
Hrangeka - C Lalhriatpuia "
Hrangeka Kid - Lalfakmawia leh R Vanlalpeka
Kiauva - R Vanlaldika
Judy Ṭhiaii - TS Lalremtluangi
Judy Ṭhiaii nu - Lalrothangi
Cowboy Lalramnghaka
Sherrif Chalchhuna leh a thenawm pa- Thangtea