Lalrinhlui Tlumang music video pahnihna "A hmangaihna fakin i zai ang"

Mizo Idol 2015 a top 10, Chawnpui Veng nula Lalrinhlui Tlumang chuan gospel music video pahnihna tur "A hmangaihna fakin i zai ang" tih chu a peih fel ve leh ta. He music video hi a danglam bikna chu Chang khatna leh chang hnihna hi Sap hla in a sa a, Chang thumna leh changlina hi Mizo in a sa thung a ni. Hla pakhat nisi ṭawng chihnih hmanga a siam chungchang zawhna chhangin Lalrinhlui Tlumang chuan, nikum May thlaa mual liamta a pa duh dan a nih vang a nih thu a sawi. Lalrinhlui Tlumang music video thar hi zanin hian Zonet Zawlbukah chanchinthar puan hmain tihchhuah a ni ang.

He music video hi Milestone Picture kutchhuak niin, Blue Wave Recording-ah record a ni a. Music hi Kima Chhangte a siam a ni thung. "A hmangaihna fakin i zai ang" hi Kristian Hla Bu No 146 niin vanram ngaihhla zinga kan sak zin ber a ni hial awm e. Album siam a tum hnai em tih zawhna chu, zirlai a la nih avangin tunhnaiah album siam tumna a nei lo tih a sawi.