Blackpink-in Eminem an khum

Korean pop band lar tak leh tunlaia khawvel huap ang pawha huhang ngah ber pawl Blackpink chuan YouTube-a subscriber neih tam lamah Eminem khumin, maktaduai 44.1 an nei tawh.

Eminem hian subscri­ber maktaduai 43.9 a nei mek a, music lama subscri­ber ngah pangana a ni. Blackpink hian Eminem ai hian subscriber an neih tam tawh bakah hmeichhe zaithiam zinga YouTube-a subscriber ngah ber an ni a, zaithiam zinga YouTube-a subscriber ngah palina an ni mek bawk.

Blackpink hi khaw­thlang lamah pawh an tla na hle a, western top artist zinga mi Lady Gaga leh Dua Lipa-te pawhin an lo zaipui tawh a, tun thla tawpah hian Selena Gomez an thawhpuina hla chu an tlangzarh leh dawn bawk a ni.

YouTube hi an lal ram a ni ve hrim hrim a, YouTube record eng emaw zat lo siam tawhtu niin subscriber pawh hi an ngah chak hle. Tunah hian Ed Sheeran (subscriber mtd 45.3), DJ Marshmellow (subscriber mtd 47.7) leh Justin Bieber (subscriber mtd 56)-te chu artist zinga subscriber ngah lama an la khum loh an ni maia, music scene-a an inlanna a la rei loh ngaihtuah chuan subscriber hi an ngah chak hle a ni. Kum 2016 khan an indin chauh a, kum li chhung lekin khawvelin artist a ngaihven ber zingah an tel hman a, hmeichhe artist zingah phei chuan subscriber ngah ber an ni der tawh a, K-Pop band zingah chuan hmabak nei eng ber pawl an ni tih a chiang.

Blackpink member-te hian zai leh lam lamah talent an nei ṭha tih chu khawvelin a hre tawh a, tunah hian an member zinga mi Jisoo chuan lemchan lamah ke a pen dawn a, BLINK ho chuan an ngeiven hle a rinawm.

Kim Ji-soo, Jisoo tia hriat lar hi KDrama 'Snow­drop'-ah a inlan dawn a, a inlan dawn tih bak hi chu thil chiang lutuk dang erawh a la awm rih lo. Achangtunu ber erawh a nih dawn hmel a, hemi chungchang hi Blackpink dintu YG Entertainment lam pawhin an sawi chiang tawh niin media ṭhenkhat chuan an tarlang.

'Sky Castle' screenwriter leh director duo Yoo Hyun Mi leh Jo Hyun Tak-te chuan 'Snowdrop' puitlinna tur hian hma an la mek a, 'Snowdrop' tih pawh hi a working title chauh a la nih hmel bawk a ni.