Hamas nena inbeihnaah 'Fauda' actor Idan Amedi a inhliam

Israeli singer-songwriter leh actor, Netflix hit series 'Fauda' a chang, Idan Amedi chu Gaza Strip-a Hamas firfiakte nena an inbeihnaah hliam na tak a tuar a, damdawi inah enkawl mek a ni.

Nikum October thlaa Hamas firfiakte'n Israel an beih avanga Israel sipaite'n Gaza Strip-a beihpui thlak a, Hamas nen an indo hnuah, Amedi hi an ram chhan tur hian Israel Defence Force (IDF) reserve-ah a inpe a ni. Amedi hi 'Fauda'-ah IDF unit sipai angah a chang nghe nghe. Gaza Strip-a Khan Younis-a Hamas te nen an inbeihnaah hliam hi a tuar a ni. 'Fauda' series-a changtu dang, Lior Raz pawh IDF reserve-ah inpein indonaah hian a kal ve bawk a, an crew member dang pakhat chuan Hamas nena an indonaah hian nunna a chan tawh bawk.