Netflix India sum lak luh 75% in a pung

Streaming giant, Netflix India-in financial year 2023 chhunga a sum lak luh chu kum 2022 aiin 75% zetin a pung. Hemi rual hian hemi hun chhung veka a sum senral pawh 23.9% in a pung ve bawk.

OTT platform hi Amazon Prime Video, Disney+ Hotstar leh Jiocinema te nen an inel chho a ni. Disney hian Reliance Industries nena thawh dun dan tur an buaipui mek a, hei hi an tifel thei a nih chuan Netflix tan pawh elpui a hautak chho hle ang.

Netflix hian December 2021 khan India ramah subscription plan man a tihniam a, hei vang hian subscriber pawh an pun phah hle. Netflix co-CEO Ted Sarandos chuan India ramah entertainment lam lawm mihring an tam a, hei vang hian an tan pawh 'big prize' a ni tiin, market mila a plan man pawh an siam rem avangin hmangtu pawh an pung chho nasa tih a sawi a, an film leh series pek chhuah lamah pawh hma a sawn hle tih a sawi.

Kum 2023 khan Netflix hian India bakah ram dangah pawh password sharing a titawp a, hemi hnu hian India-ah subscriber boost-na turin Rs 140 per month mobile-only plan chu nasa takin a promote chho bawk. He plan hmang hian subscriber pawh an pun phah hle a ni.

Media Partners Asia Research (MPA)-in a tarlan danin, kum 2023 chhunga India video industry (TV leh digital huam telin) hlutna chu USD tld 13 a tling a, Asia-Pacific (APAC) region-ah pathumna niin, China leh Japan hnuaiah a awm. India video market hlutna pawh kum 2028-ah chuan USD tld 17 a tling chho dawn niin a chhut bawk.