Lady Gaga-in 'Chromatica' a tlangzarh ta
Lady Gaga chuan a album ngaihven hlawh tak tak 'Chromatica' chu nimin khan Streamline leh Interscope Records kaltlangin a tlangzarh.
'Chromatica' hi streaming service hrang hrangah ngaihthlak theihin a awm tawh a, Gaga fan-te tan chuan ngaihven ran chi a ni ngei ang.
Gaga hian 'Chromatica' album-a a hla dah tur chungchangte hi a hmain a lo sawifiah tawh a, a music tharah chuan 'damna' leh 'huaisenna' lam a inzep nasa dawn tih a sawi.
"Ka thil zirchhuak tak nia ka hriat chu, khawvel hi ka duhthlanna angin ka hmu thei a ni. Thil ṭha lo zawng zawng ka paih bo tihna a ni lo a, ka nuna thil thlengte kha kawng dangin ka thlir tawh zawk a, chu chu Chromatica chu a ni. Chromatica-ah ka cheng a, Khawvel ka paih bo a, Chromatica-ah ka cheng a ni," tiin a album thar tur chungchang hi a lo sawi tawh a ni.
A studio album parukna a ni tawh a, a album hmasa ho zawng zawng a 'hit' vek bawk nen, 'Chromatica' pawh miin an beisei sang hle.
Track 16 awmna album-ah hian mi lar tak tak a thawhpui nual a, Ariana Grande, Blackpink leh Elton John-te a thawhpui a ni.
Single pahnih a tichhuak tawh
February thla tawpa a tihchhuah 'Stupid Love' kha 'Chromatica'-a mi hi a ni a, he hla hi January thla khan a leak hial a ni. Kar hmasa Zirtawpni khan a single pahnihna, Ariana Grande nena an sak 'Rain on Me' chu a tichhuak bawk.
'Stupid Love' hian YouTube-ah thlirtu maktaduai 85 a nei tawh a, 'Rain on Me' hian kar khat chhungin thlirtu maktaduai 60 chuang a nei leh der tawh bawk a ni.
'Chromatica' midang tan
Lady Gaga hian a album thar hi midang ṭanpuina atan a hmang ṭangkai dawn a, delivery app Postmates thawhpuiin celebrity chef Jose Andres-a World Central Kitchen organisation tan tun weekend chhung hian album order pakhat zelah $1 a thawh zel dawn.
Heta pawisa tling khawm hi $100,000 thleng chu hunger relief fund-ah hian a pe dawn a ni.
'Chromatica' hi April-a thlangzarh tura a ruahman tawh kha a ni a, mahse hripui a len avangin a tikhawtlai a, niminah khan a tlangzarh ta a ni. Lady Gaga hian 'A star is born' film avang khan 'Oscar' hial a dawng tawh bawk.