CGI hman aiin thlawhtheihna tak tihpuah kha a hautak lo zawk: Nolan

'Dark Knight Trilogy' siamtu, film siamtu lar Christopher Nolan chuan a film siam tharah thlawhtheihna tak tak tipuakin CGI hman aiin thlawhtheihna tak tihpuah kha a hautak lo zawk tih a sawi.

 Christopher Nolan hian a film tihchhuah thar tur a buaipui mek 'Tenet'-ah special effect hmang loin Boeing 747 thlawhtheihna tak tak a tipuak a, hei hian sawi zui a hlawh hle. Hemi chungchang hi sawi langin,"Ka ruahman dan chuan miniature leh set-piece siam chawp leh visual effect hman ka tum a ni. Mahse Victorville, California-a hmun kan zawn laiin thlawhtheihna hlui lian ṭha tak kan hmu a ni," a ti.

Nolan chuan an han inchhut chian chuan thlawh­theihna lei mai chu a senso a tlem zawk tih a sawi a ni.

Thlawhtheihna tak tak tihpuah a nih chungchang hi Cinemablend-ah 'Tenet,-a chang ve John David Washington chuan a sawi a, "Thlawhtheihna tak tak a ni a, thlawhtheihna an sut puahtir building pawh kha a tak tak a ni. Keini a changtute leh crew-te pawin kan hmu vek. Thil ropui tak a ni! A awihawm loh zawk hial a, kan vaiin lawmin kan au a ni," tiin a sawi.

'Tenet' hi July 17 hian tlangzarh tum a ni a, Robert Pattinson leh Elizabeth Debicki-te chu changin nikum March aṭang khan hma an la 

ṭan a ni. Budget pawh a sang hle a, $ maktaduai 205 lai an dah. 

Christopher Nolan film siam hian ngaihven a hlawh ṭhin a, 'Tenet' pawh hian tlangzarh a nih hma hauh aṭangin thawm a nei ring tawh hle a ni.