Sonic the Hedgehog Chhunzawmna tur an buaipui ṭan

Kumina film tlangzarh zinga a 'hit' ber zinga mi, Box office-ah pawh kar eng emaw zat roreltu Sonic the Hedgehog chhunzawmna tur chu an buipui leh ṭan tawh.

Paramount Pictures leh Sega chuan Ningani khan US-ah Sonic the Hedgehog 2 an buaipui leh ṭan tawh tih sawiin film hmasa siamtute bawkin an buaipui leh a ni. Director Jeff Fowler bawkin a direct leh dawn a, writing duo Pat Casey leh Josh Miller-te chuan script an ziak dawn a ni. 

Neal H. Moritz, Toby Ascher leh Toru Nakahara-te chu producer an ni dawn a, Hajime Satomi, Haruki Satomi leh Deadpool director Tim Miller-te chu exe­cutive producer an ni bawk ang.

Sonic the Hedgehog 2 chan ṭan hun tur leh a changtu turte tarlan la ni chiah lo mah se Ben Schwartz (Sonic), Jim Carrey (Dr. Robotnik), James Marsden, Tika Sumpter leh Colleen Villard-te chuan an role ngai an chan leh hmel a, film hmasa end credit scene-ah khan a chhunzawmna tur a awm hmel hle a, kan beisei aia hmain kan hmu dawn niin a lang.

Sonic the Hedge­hog khan $ maktaduai 307 vel a hmu chhuak a, hlawhtling viau mah se live-action video game adaptation film hlawhtling top 5-ah a lang phak lo thung.

Warcraft khan $mtd 439 a hmu chhuak a, Detective Pikachu khan $mtd 433 hmuchhuakin Rampage khan $mtd 428 a hmu chhuak bawk.