Billboard 200: A chung berah 'One Thing at a Time' a rawn kir

Billboard 200 album chart thar berah Morgan Wallen chuan 'One Thing at a Time' chu tlangzarh a nih aṭanga kum khat dawn a tlin hnuah pawh no. 1-ah a rawn kir leh. He album hi a zawn loin no. 1-ah kar 17 a awm thei ta a ni. Top 10-ah kar 45 zet a awm tawh bawk.

Kar liam ta chhung khan 'One Thing at a Time' hian US-ah equivalent album unit 61,000 neiin, kum 2022, May 7 hnua no. 1 album-in unit a neih tlem ber ṭum a ni thung. Nikum March thlaa tlangzarh, 'One Thing at a Time' hian tlangzarh tirh hian album sales 5,01,000 zet neiin no. 1-ah a rawn lang a, kar 12 zet a chung ber dinhmun hi a hauh thei. Tlangzarh karah hian on-demand stream mtd 498.28 neiin, Spotify-ah ni khata male artist zinga country album stream ngah ber a rawn ni thei a ni.

No. 2-ah Drake 'For All the Dogs' awmin, equivalent album unit 58,000 a nei. 2024 Billboard 200 leader hmasa ber, Taylor Swift '1989 (Taylor's Version)' chu no. 1 aṭangin no. 3-ah a tla thla thung a, equivalent album unit 56,000 a nei. Nicki Minaj 'Pink Friday 2' chu no. 4-ah a la awm chhunzawm zel a, Noah Kahan 'Stick Season' chu no. 8 aṭangin no. 5-ah a rawn invawrh chho a, SZA 'SOS' pawhin step khata hma sawnin, no. 6-ah a awm.

Album chart Top 10-ah Taylor Swift album 'Midnights', 'Lover' leh 'Folklore' bakah Zach Byran self-titled album te an lang bawk a ni. Tun ṭum Top 10-ah hian hla release thar lang an awm lo.