Google-ah second tinin search 99,000 a awm

Internet khawvelah kan cheng tawh a, kan thil mamawh leh hriat duhte pawh internet hmangin kan zawng ber tawh. Internet lama thil zawn/search-na atana hman nasat ber chu Google niin, internet hmangtu zinga 90% chuangin ni tin thil search-na atan kan hmang.

Google hi khawvela search engine no. 1 a ni a, search engine market share-a 91.52% hi a hui. Search engine atan mi 10 zinga 9-in Google hi an hmang tihna a ni. Second khatah search 99,000 vel awm ziah ang niin, ni khatah 8.5 billion search a awm. Kum khat chhunga a search hi trillion 2 a tling.

Kan thil zawn process leh a chhanna tarlanna turin Google hian a tlangpuiin second 36 vel a hmang a, search engine kaltlanga thil zawn zinga 15% hi thil danglam leh dangdai tak a ni. A hmangtu zinga 84% hian ni khatah vawi thum leh a aia tam Google-ah thil an search ṭhin. Kum khat chhungin mi pakhat hian Google-ah hian vawi 10,95 - 1,460 inkar thil a search ṭhin. Google search zinga 60% hi mobile device aṭanga zawn a ni bawk.

Google App hmanga thil zawngtu zinga 20% hian voice search an hmang a, thla tina thil search zinga 46% hi local content lam a ni. Google Assistant hi thla tin mi mtd 500 chuangin hmangin, Google Lens hi thla tin vawi tld 8 vel hman a ni ṭhin bawk.

Kum eng emaw chen chu Google kaltlanga thil search nasat ber chu 'YouTube', ‘Facebook,’ ‘Weather,’ ‘Amazon,’ leh ‘Gmail.’ an ni. Nikum chhung khan 'YouTube' hi search nasat ber a ni leh a, thla tinin 'YouTube' tih search hi mtd 338.94 awm ziah ang a ni. Google search list tam lamah hian YouTube dawtah Facebook awmin thla khatah search volume mtd 251.39 a awm. A dawta search tam zual chu pornhub, weather, amazon, translate, xvideos, gmail, google translate leh whatsapp web-te an ni. Gmail hmang hi khawvel pumah mi tld 1.8 chuang an awm tawh bawk a ni.