A7X-in an hla thulkhung an phawrh 'Set Me Free'

Avenged Sevenfold chuan nimin khan YouTube-ah an fan-te hla ngaihthlak theih turin an hla, thulmawnga hun rei tak chhung an dah tawh 'Set Me Free' chu an dahchhuak. Hun eng emaw chen hla thar an neih loh hnuah nimin khan 'Set Me Free' hi an phawrh a, a mawi lehpek hle. Synyster Gates guitar solo lungkuai tak mai ngaihthlak tur a awm a, M. Shadows aw 'pa' tak mai zuna uaite tan chuan ngaihthlak thuai chi a ni ngei ang.

'Set Me Free' hi nimin khan tlangzarh chauh mah se hla thar a ni lo. A7X hian kum 2013-a an tlangzarh 'Hail To The King' a telh tura an record daih tawh kha a nih thu ziaklangin, an telh leh tak si loh avangin hunrei tak chhung an tlangzarh loh hnuah nimin khan an tlangzarh ta a ni. 'Hail To The King' hi a hunlai khan Billboard 200-ahte pawh pakhatna lo ni zak zak tawh a ni bawk.

'Hail To The King' kha A7X studio album parukna niin, an drummer  Jimmy "The Rev" Sullivan thih hnua album an tlangzarh pahnihna a ni a, 'The Rev' kuthnu tel lo album an tlangzarh hmasak ber a ni bawk. Kha album-a bonus track 'St. James' khan 'The Rev' hriatrengna tura an dah a ni nghe nghe.

Avenged Sevenfold hian 'Set Me Free' an tlangzarh hi an la duhtawk mai lo. February 7 hian 'Diamonds in the Rough' album B-side-a hla an tlangzarh loh an dahṭhatte chu tlangzarh an tum thu an tarlang bawk. Heng hlate hi streaming service hrang hrangah ngaihthlak theih turin an dahchhuak dawn a ni. 

A7X hian 2016-a 'The Stage' album an tlangzarh hnu khan album dang an la tlangzarh leh lo a, rock show lian thamah chuan an inlan reng thung. 2018 khan Synyster Gates chuan Loudwire-in an interview-naah an studio album pariatna tur muangchanga an buaipui ṭan leh thu a sawi a, nikum March thla khan  Zacky Vengeance pawhin album thar lamah an insawrbing thu a sawi tawh bawk. Tunah chanchin thar an rawn neih leh takah hian kumin chhung hi chuan ruahmanna eng emaw an nei a ni mahna.