Lelte Award 2020: K Hminga hringnun diary-ah Award pahnih ziah belhin a awm

Mizorama award hlun ber pawl leh ngaihhlut hlawh ber pawl Lelte Award vawi 29-na chu Zirtawpni zanah khan ropui takin Vanapa Hall-ah sem a ni ta a, tunlaia Mizo zaithiam zinga huhang ngah ber pawl K Hminga chuan award pahnih lai a hum haw a, Songwriter of the Year leh Male singer of the Year award a dawng.

Lelte Award 2020 hi Zonet, LPS leh YouTube-ah live-in pek chhuah a ni a, hripui leng vanga sorkar dan dinglai zawm a ngaih avangin a hmunah chhimtu awm phal a ni lo a, performer-te leh award dawngturte chiah an kal a ni. Dr R Lalthlangliana,  Honble Minister Health & Family Welfare Dept chu khual lian a ni a, ani hain thu a sawi bakah Chief Organiser C Dinthanga pawhin thu a sawi bawk.

Tunlai Mizo zaithiam zingah chuan ani aia huhang ngah leh mipuiin an ngaihhlut hi an awm chuang awm lo e. Lelte Award-a Song writer of the year leh Male singer of the year (Lengzem) a dawng pawh hi tumahin an sawiselin a rinawm lo.

A hla phuahte uluk taka han ngaihthlak phei chuan ṭhangthar hla phuah thiam zingah a ber a nih loh pawhin a dawttu tal chu a ni ang tih tur khawpa hla phuah thiam K Hminga'n Song writer of the year award a dawng hi a inhmeh zual a, chutiang chiah chuan Male singer of the year (Lengzem) a dawng pawh hi a inhmeh hle.

Awm lo ta la, Hringnun Diary, Tunge inthlei thei leh Siar Lanu te phuah chhuak thei K Hminga hian a chawimawina dawn tur tak a dawng a ni ber mai. Social media lama comment ṭhenkhat aṭanga a lan dan phei chuan a hlate hi mi tam takin zirlaibuah dah tlakah an ngai hial.

A hunlai zel nena khaikhin chuan Vanlalsailova anga Mizo zaithiam lar kha an awmin a rinawm lo. Chu a hunlai chu a liam hleithei lo a, tun thleng pawhin YouTube-a a hla dahte chu Mizo hla ngaihthlak nasat ber pawl a la ni reng. Kum tam tak chhung chu Mizo zaithiam zinga a 'top category'-ah a la awm char char a, Lelte Award 2020-ah pawh a music video 'I lamah a ṭang' hmangin Music Video of the Year Gospel a la dawng thei a ni.

Lelte Award 2020 hi Baryl Vanneihsangi chuan thiam takin a host a, Sawmtea chhangte, Feli Fanai, Dj Lalvenhimi, Zorinzuali khiangte, Hlimhlimi, K.Hminga, Rosy K Remsangpuii, Hmingtea chhangte, Lalduh­saki, Lallawmawma, K. Lalthlamuankimi leh D Tawnglo band-te an perform a ni.

Lelte Award 2020-ah hian Sawmtea Chhangte chuan Gospel Artist of the Year male a dawng a, ani hian kum li ngawt he award hi a lo dawng ta a ni. Kum 2016, 2017 leh 2018-ahte khan he award hi a lo dawng ta a, la duhtawk mai loin kuminah a dawng leh ta a ni.