Kum 28 hnuah India-in Miss World Pageant thleng dawn

India chuan kum 28 hnuah Miss World Pageant a thleng ve leh dawn a, March 9 zanah Mumbai-a Jio World Convention Centre-ah 71st Miss World Final hi neih a ni ang.

71st Miss World Pageant hi February 18 - March 9 chhung hian neih a ni dawn a, intihsiakna hi New Delhi-a G-2- site, Bharat Mandapam-ah pawh neih a ni ang. February 20-ah New Delhi-a Hotel Ashok-ah India Tourism Development Corporation (ITDC) chuan 'The Opening Ceremony' leh 'India Welcomes the World Gala' a lo buatsaihsak dawn a ni.

Miss World event hi kum 1951 aṭanga buatsaih ṭan niin, tuna Miss World title chelh mektu chu Poland mi, Karolina Bielawaska a ni.

India-in he pageant a thlen hnuhnun ber chu kum 1996 kha niin, Bengaluru-ah neih a ni. Miss World intihsiaknaah hian India hi a che ṭha ber zingah telin, he title la thei hi mi paruk an awm tawh. India hmeichhe zingah Miss World ni thei hmasa ber chu Reita Faria Powell niin, kum 1996 khan thlan a ni. Kum 1994-ah Aishwarya Rai Bachchan thlan niin, 2007-ah Diana Hayden. Kum 1999-ah Yukta Mookhey, 2000-ah Priyanka Chopra Jonas leh 2017-ah Manushi Chhillar-te chuan Miss World crown hi an lo khum tawh bawk.

Kumina intihsiakna tur zingah hian World Top Designer Award & Miss World Top Model, Miss World Sports Challenge, Miss World Talent, Multi-Media Challenge, Head to Head Challenge, Continental Beauty With A Purpose Challenge bakah Miss World Red Carpet Special te a awm ang. Ram 120 aiawhte an tel dawn a, India aiawhin Femina Miss India World 2022 Sini Shetty a tel dawn a ni.