Concert ṭan tlai vangin Madonna an khing

American singer, Madonna chu a concert neih tur a ṭan tlai avangin mi pahnihin an khing.

Madonna khingtute hi Michael Fellows leh Jonathan Hadden an ni a, kar liam ta khan Brooklyn federal court-ah a khinna hi an theh lut a ni. Court-a an thu theh luhah hian Madonna-in Celebration tour a neihah, nikum December 13-a Barclays Centre-ah concert a neih tur chu an ram huna zan dar 8:30-a ṭan tur tih a nih laiin, 10:30-ah a ṭan thei chauh a, zan dar 1 velah an bang thei hram niin an sawi. Concert a zawh hnuah public transportation lam a mumal tawh loh avangin an tang reng a, a tuka an hna lama an kal tur thlengin a nghawng niin an sawi. Madonna bakah tour promoter Live Nation leh Barclays Centre chu an in-advertise dan an zawm loh avangin an khing tih an sawi a, December 14 leh 16-a an show nei pawh darkar hnih chuangin an tlai tih an tarlang bawk.