Lalhmangaiha (MALTA) kan chan ta

Mizo mipuite lawm hlawh tak, an hla hmanga mipuite tihlim ṭhin, MALTA vocalist Lalhmangaiha chu kum 63 mi niin nimin zing khan cancer vangin a thi a, nimin chawhnu khan Bethlehlem Branch YMA Hall-ah vui liam a ni.

Kum 1991 khan Lalhmangaiha hian YMA lama a thawhpuite leh ṭhiante 'Mak An La Ti Ang' (MALTA) tih hi an din a, infiamna lam bakah zai tein hun an hmang ṭhin. He an band din hi vawiin thlengin mite'n an hriatna niin, Zoram pum an deng chhuak a ni. An hla lar zingah hian tun thlenga lawm leh sak hlawh tak tak 'Rotuiburi', 'Ka u Liana', 'Ṭhuamṭingṭanga', 'Di Tawng lo Val, 'Hrangkekuali' an tel.

Kum 20 vel kal ta aṭang khan Pathian rawngbawl hna luhchilhin, home crusade te a nei ṭhin a, hei bakah Home lamah leh Mizoram pawn thlengin rawngbawlin a chhuak ṭhin. Nikum December thla tawp lam khan chuap cancer a ni tih hmuhchhuah a ni a, hun eng emaw chen damdaw inah an inenkawl hnuin January 11 khan in lama inenkawl zawm turin an chhuak a ni. Zirtawpni liam ta aṭang khan a dinhmun hian hniam lam panin, nimin zing dar 7:26 khan a boral ta a ni. A nupui Vanlalhliapi, a fate pali leh tu pasarih a kalsan a ni.