Khiangte Construction Ṭhazual GOSPELPakhatna hauhtu Melody Lalzirliani 'Mittui a hul ang'

Kum 2024-a Khiangte Construction Ṭhazual Gospel chart hmasa berah Melody Lalzirliani chuan a hla, 'Mittui a hul ang' tih hmangin pakhatna dinhmun a hauh.

Melody hian 'Mittui a hul ang' tih hi nikum December 10 khan YouTube-ah a dah chhuak a, he hla hi lehlin niin a letlingtu hi Mavuana a ni. Music video hi Chiangtea Videography kutchhuak a ni a, music hi Lal K Sailo kutchhuak niin, recording hi Masky Record-ah a ti a ni. He hla hi chatuan ram ngaih hla niin, a letlingtuin a thiam a, a satu aw a mawiin a sa lungrun bawk si, a zaithiamzia kan hmu chiang leh zual.

Chart-ah hian hun rei tak Pathian fakna hla satu lar ber zinga mi ni reng thei, Nancy Zothanmawii 'Ni li a liam ta' tih chu pahnihnaah a rawn lang bawk. Faktu 'Hruai zel ang che' tih chu pathumnaah awmin, Arini Ralte 'Hei chauh ka dil' leh Mama Khiangte 'Kan ngai tawh lo'ng' chu Top 5-ah a lang bawk.

Ṭhazual Gospel Top 10-ah hian chart hmasa lama lang, Lalthlengliani Jongte chu paruknaah a la awm a, a bak Lalfakzuali, The B4, Stacy VL Muanpuii leh Lalnunhlui Hmar-te chu chart-a rawn lang thar vek an ni thung.