iPhone thar 6GB ram a ni dawn

iPhone thar, kumin September thla vela tlangzarh tura rinah chuan 6GB ram dah a nih dawn bakah a baterry pawh a ṭha lehzual dawn niin mithiamte chuan an sawi.

UBS analysts Timothy Arcuri leh Munjal Shah-te chuan iPhone chhuak thar tur hi 6.7-inch leh 6.1-inch display a ni dawn nia sawiin, 6GB ram a ni tawh dawn tih an sawi a ni. Heng model pahnihte hi  iPhone 12 Pro Max leh iPhone 12 Pro tia hming vuahin tlangzarh a nih an ring bawk. 3D sensing triple camera a ni dawn tih sawiin, variat hnih an tlangzarh an rin thu analyst-te chuan an sawi. A man tlawm chiah erawh 4GB ram an la dah tho ringin, dual camera a ni dawn tih an sawi bawk a ni. A man tlawm chi zawk hi chu 6.1 inch leh 5.4 inch display-a an siam an ring.

iphone thar turte hian OLED screen an hmang dawn niin a lang a, a notch pawh a tet zawk hmel bawk. A man tlawm chiahte hi chu sub-6GHz 5G hmang tura duan an ni dawn a, a man sang hoah erawh hi chuan mmWave 5G dah a ni dawn tih an sawi a ni. Mithiamte chuan iPhone thar hi iPhone 11 aiin $50 aia tamin a to zawk an ring.