June thla aṭangin 'Billboard Korea' tichhuak dawn

Music industry lama chart, news, opinion, review, event leh style chungchang tichhuaktu, Billboard magazine chuan huang zauh zel an tum a, kumin June thla aṭangin Billboard Korea an tichhuak tel tawh dawn.

Korean music-in khawvel huapa thawm a neih len chhoh zel avangin Global Entertainment Media Group (GEMG) thawhpuiin, Billboard Korea hi siam a ni dawn a, June thla ah a issue hmasa ber, 'Billboard K Vol.1' tihchhuah a ni ang. Billboard president,Mike Van chuan an hmalakna thar tur chu a phurawm tawh hle tih sawiin, an platform lama Korean music-in an thawh hlawkzia sawiin, an huang zauh tur chu an tan mellung pawimawh tak a ni dawn a ni, a ti. GEMG chairperson, Yuna Kim pawhin khawvela K-artist leh K-pop lar chhoh chakziate sawiin, Billboard Korea chu K-culture promote-na kawngah pawh a pawimawh dawn hle tih a sawi .

June thlaa Billboard Korea tihchhuah hma hian official website leh digital platform-te an hawng hmasa dawn a ni. Billboard hian a hmain international edition - Billboard Japan, Billboard Arabia, Billboard Espanol leh Billboad Brasil-te an lo tichhuak tawh bawk.