Selena Gomez Worship leader a nih chungchang a sawi chhuak
Thla hlui tawh khan Los Angeles-a Hillsong Kohhranin Young & Free Revival Concert an buatsaihah Selena Gomez chu worship leader-ah an hmang a, hemi chungchang hi Selena Gomez chuan chiang lehzualin a sawi chhuak.
Selena hian IG-ah thlalak, worship leader a nihna thlalak a dah chhuak a, a caption-ah 'First time, I ever lead worship' tih a hmang. Selena hi a hma aṭang tawhin, nikum lam aṭang tawh khan Bible class-ah a lo kal fo tawh ṭhin a, Pathianniah pawh a remchan phawt chuan a inkhawm ṭhin.
Concert-a a hla sak chungchang hi Selena chuan sawiin, "Fakna hla ka phuah hmasak ber ka sa tur kha ka lawm em em a, Pathian khawngaihna leh a ngaihhnathiamna ka dawng kha ka lawm a ni," a ti. Hemi ṭuma a hla sak, ama phuah hi 'Nobody' a ni a, a zai dawn hian, "Zanin hi concert ringawt a ni lo a, Hillsong a ni ringawt hek lo. Stage-a ka rawn lan leh hla ka rawn sak piah lam thil a ni a, chu chu thil dang zawng zawng nena inlaichinna aia ropui zawk inlaichinna a ni," a ti.
'Nobody' hla hi Selena chuan amah leh Pathian inlaichinna hla a ni a, "Amah chungchang hla a ni" tiin Twitter-ah a lo puang tawh a ni. Hotel Transylvania 2 tihchhuah dawn hnaihah chanchinbuten an kawmnaah Selena hian Kristian a nih thu sawi chhuakin, US hmun hrang hranga a kalnaah Hillsong Kohhranah a inkhawm ṭhin tih a sawi a ni.