Box Office : A kar hnihna atan no. 1-ah 'Mean Girls'

Kar liam taah film release thar lian tham a awm lo a, 'Mean Girls (2024)' luahlan thei an la rawn awm lo. A kar hnihna atan North American box office-ah no. 1 a ni chhunzawm leh a ni.

Tlangzarh kar aiin ticket sales hi 60% dawnin tlahniam mah se, a kar hnihnaah musical hian North America-ah USD mtd 11.7 a lak luh belh a ni. USD mtd 36 budget hian domestic-ah USD mtd 50 leh territory dangah USD mtd 16.2 la lut tawhin, khawvel huapa a sum lak luh hi USD mtd 66.2 a tling tawh.

'The Beekeeper' chu pahnihnaah awm chhunzawmin, USD mtd 8.5 a hmuh belh leh a, no. 1 dinhmun pawh lo hauh tawh, 'Wonka' chuan a kar ruknaah USD mtd 6.4 a hmuh belh leh a, pathumnaah a awm a, khawvel huapa a sum lak luh hi USD 531.8 a tling tawh bawk.

'Anyone But You' leh 'Migration' chuan a dinhmun ngai, no. 4 leh 5 an luah chhunzawm zel a, "Aquaman and the Lost Kingdom" pawh no. 6-ah a la lang bawk. Film release thar zingah Top 10-a lang pha chu sci-fi thriller, 'I.S.S' chauh niin no. 7-ah a awm a, theatre 2,520 aṭangin USD mtd 3 chauh a hmu pha. Reviews lam pawh a hmu ṭha lo hle a, Cinemascore-ah pawh audience-te'n 'C-' rating an pe a ni.