'What's In The Eye' Chester kum 17 mi nih lai zai ngaithla duh tan

Linkin Park vocalist fam ta  Chester Bennington band hlui Grey Daze chuan Ningani khan hla thar 'What's In The Eye' an tlangzarh a, hetah hian Chester-a'n kum 17 mi a nih laia a zai record an dahṭhat ngei an hmang.

Grey Daze hi Chester-a band hlui a ni a, Linkin Park a zawm hmaa a telna ṭhin a ni. Kum 2017-a a thih hnu lawk khan Grey Daze hian an hla hluite thar thawh leh zai relin album pawh tlangzarh ngei an tum a, tun hi rah an chhuah theih hmasa ber a la ni chauh thung.

Chester-a'n 1993 vela a zai a record kha Grey Daze hian an hla tharah hian an rawn chhawpchhuak a, Chester fan-te lung tilengtu a ni ngei ang. "In hriat vek Chester aw ngei kha a ni e," tiin Grey Daze chuan an ziak lang tel a, Chester-a nupui  Talinda pawhin tunhnai lawk khan a pasal thi ta chuan a fan-te chuan a zai lo record tawhte chu ngaithla vek se a duh tih leh Grey Daze-te hi rimawi lama a bulṭanna a nih thu a lo sawi tawh a  ni.