Parema'n a hla phuahte album-in a siam leh dawn

Fakna hla lamah chuan tunlaia hla phuahtu lar, Parema (R. Lalremruata) chuan a hla phuahte zaithiam hrang hrang saktira album-a tihchhuah leh tumin hma a la mek.

Parema hi cancer natna avanga enkawl chhoh mek a ni a, hetihlai hian Pathianin hla ṭha tak tak a pe reng a, hla a dawn hrang hrangte hi album-a siamin a lo tichhuak tawh ṭhin a, tunah hian album dang a buatsaih leh mek a ni.

Album pali a lo tichhuak tawh a, a hlawhtlingin a lar hlawm hle a, a album hnuhnung ber 'Ka rinchhan Lalpa' phei kha chu a hlawhtling lehzual hle a, he album-a hla, single music video-a tihchhuahte chu Zonet Ṭhazual chart-ah pakhatna an luah fur hlawm. A album hming put chhan 'Ka rinchhan Lalpa' tih hla phei kha chuan a testimony hla, cancer natna tuara a awm laia Pathianin a pawlna hla, hla ṭha leh ropui tak a ni.

Tuna album a tihchhuah leh tumah hian Mizo, Hindi leh English hlate dah turin a ruahman a, hla awm tur zat erawh a chiang thei rih lo, hla 10 emaw vel a dah a rinawm. Zai turte pawh an inbe fel thawkhat tawh a, mahse amah, Parema ber a la damsam loh avangin hma duh ang chuan a la chak thei rih lo a ni. Audio recording zawh fel tawh leh tih mek pa≠nga a awm a, a ṭhen hi sound track an siam mek bawk.

A album tur hming hi 'Ka vui lo Lalpa' tih a ni a, natna hrehawm tak, a hringnuna harsatna hrang hrang a tawh karah pawh Pathian laka a vui lohzia a puan chhuahna tur album a ni a, album ropui tak a ni leh ngei ang. He album-a hla awm tur zinga hla pakhat 'Min chhung khat leh ṭhin' tih hla chungchang Parema chuan sawiin, "Ka nun kawngah hian thil tam tak ka tawng chho ve a, tisa leh thlarauva ka chauh chang nite hian hmangaiha min thlah lotu Lal Isuan min awmpui reng a, chakna thar min pe lehin, a Thlarau Thiang≠hlima min chhung khat leh
ṭhin hi a ropui ka tiin, he hla hi Lalpan min pe ta a ni. Lalpa ka lawm e," a ti. 'Min chhung khat leh ṭhin' hla hi nikum March 7-a a phuah kha a ni a, One in Christ-in an sa ang.