Mizo film-in National Film Award a dawng dawn

May thla khian Delhi-ah National Film Award lawmna neih a ni dawn a, hetah hian Mizo film "Kima's Lode Beyond the Class" chu chawimawina hlan a ni dawn.

Kima's Lode Beyond the Class hi Zuala Chhangte siam a ni a, Childrens Film Society of India-ina a produce a ni a, minute 78-a thui a ni. May thlaa National Film Award vawi 63-na neih turah hian Kima's Lode Beyond the Class hian Best Mizo Film Award a dawng dawn a, lawmman a dawnna category hi Best Feature Film in each of the language Specified in the Schedule VIII of the Constitution a ni. Zuala Chhangte hi Mizo zinga National Film Award dawng hmasa ber a ni.

Kumin National Film Award-a film ṭha bera thlan chu 'Baahubali' a ni a, Best Director chu Sanjay Leela Bansali niin, Best Actor hi Amitabh Bachchan niin, Best Actress-ah Kangana Ranaut thlan a ni. Best Film critic hi Meitei mi, Meghachandra Kongbam hnenah hlan a ni ang.

April 8 - 13 chhung hian Imphal-ah Festival of Cinema neih a ni dawn a, hetah hian Mizo film pahnih - Chengrang Lanu leh, MNF: The Mizo Uprising te screen a ni dawn bawk. Chengrang Lanu hi short film a ni a, Malsawmkima Chhangte siam a ni a, MNF film hi Napolean RZ Thanga siam a ni.