Podcasting industry a ṭhang chak; Khawvel pumah podcast mtd. 5 chuang awm

Khawvelah podcasting industry a ṭhang chak hle a, nikum chhung khan podcast ngaithla ṭhin hi mi maktaduai 464.7 an awm. Kuminah hian maktaduai 500 chuangah an pun chhoh rin a ni.

Statistics-in a tarlan danin, kum 2023-ah khawvel pumah podcast mtd. 5 awmin, episode mtd. 70 chuang pek chhuah a ni. Podcast industry hlut zawng hi USD tld. 23.56 hu a ni mek a, kumin chhungin USD tld. 30.03 vel a kai chhoh rin a ni bawk.

Podcast ngaithla ṭhin zingah kum 13-17 inkar tam berin 11% an tling a, kum 18-24 inkar 4%, kum 25-34 inkar 2%, kum 35-44 inkar 3%, 45-54 inkar 5%, 55-64 inkar 4% leh kum 65 chung lam 4% an awm. Infinite Dial report-in a tarlan danin, podcast ngaihthla ṭhin zinga 22% hian motor an khalh laiin an ngaihthla ṭhin tih an sawi.

Ngaithlatu zinga a tam ber, 79%-in smartphone aṭangin an stream a, 6% in tablet hmangin, hmun lia ṭhena hmun khat chuan web browser kaltlangin an ngaihthla bawk.

Podcast streaming zingah Spotify lar berin 33.7% share a nei a, Apple Podcast-in 27.6% share a nei bawk. Apple Podcasts hi podcast episode download tamna ber a ni thung. Spotify hian a library-ah podcast title mtd. 5 vel a nei tawh a, Apple podcast hian mtd. 2.6 a nei bawk a ni.

The Joe Rogan Experience hi khawvela podcast lar ber niin, episode tin hi ngaihthlatu mtd. 11 vel zel nei ang a ni. Podcast lar ber a nih bakah kalpui rei ber ni mekin, tunah hian episode 2,000 chuang a nei tawh. Host hi comedian leh UFC commentator Joe Rogan a ni.