Thirsakawra India ram fang chhuak tur Vanlallawmzuala a inkhalh chhuak ṭan

Vanlallawmzuala Varte (LZa) s/o VL Chhuanawma, Mission Veng chuan leilung leh a chhunga awmte venhim pawimawhzia tlangaupui turin thirsakawr hmangin India ram a fang chhuak dawn a, nimin khan MINECO Zero Point aṭangin Mizoram Pollution Control Board (MPCB) chairman Liankima Lailung-in a vailiam.

Thirsakawr hmanga India ram fan chhuahna, All India Cycling Tour hi thupui chu 'Ride to clean air’ tih a ni a, 'Clean & Green Sustainable Lifestyle Under Mission Life’ hnuaiah MPCB bultuma buatsaih a ni. MPCB-in sum mamawh turte an tum a, Mizoram Youth Commission bakah, sorkar department, páwl leh mimal eng emaw zatin an pui bawk.

Vailiam a nih hnuah LZa hian Tripura khawpui Agartala a pan nghal a, India ram state khawpui hrang hrang bakah union territory-te a tlawh dawn a, km. 16,396 vel a tlân tura ngaih a ni. A tluan chuan kumin July thlaah Aizawla rawn lêt leh tura beisei a ni.

LZa hian kum 2023 khan Lailapur, Assam aṭangin Mizoram chhim tàwp Khaikhy thleng kêa kalin, kawngpui kama plastic bawlhhlawhte a lo chhar fai tawh a, ni 18 leh darkar 13 chhungin km. 623 a kal. Tun hmain thirsakawr hmangin Mizoram dung leh vâng a fang chhuak tawh bawk.