March 6-ah 2024 Billboard Women in Music Awards nei dawn

27th January, 2024

'2024 Billboard Women in Music Awards' chu March 6 hian Inglewood, California-a Hollywood Park-a YouTube Theater-ah neih a ni dawn.

Billboard-in kum tina music industry lama thawh hlawk, hmeichhiate chawimawina hun a buatsaih ṭhinah hian kumina award hlan tur zingah K-pop NewJeans chu 'Group of the Year', Ice Spice ('Hitmaker Award'), Victoria Monét ('Rising Star Award'), Kylie Minogue ('Icon Award'), Maren Morris ('Visionary Award'), Charli XCX ('Powerhouse Award'), Tems ('Breakthrough Award') , Young Miko ('Impact Award') leh Luisa Sonza ('Global Force Award') te an tel. Award hlan tur zinga pali - Monet, Ice Spice, Minogue leh Tems te hi Grammy Awards nomination-ah pawh an lang bawk a ni.

Billboard Women in Music Awards hi kum 2007 aṭang khan siam a ni a, Taylor Swift chuan award pathum dawng tawhin dawng hnem ber a ni mek a, Woman of the Year award vawi hnih leh Woman of the Decade award a lo dawng tawh a ni.

Trace Ellis Ross chu host a ni dawn a, he huna perform turte pawh puan chhuah thuai an ni ang.