Rs. nuai 4.97 man Yamaha R3 BS6 tlangzarh

Thansanga & Sons Auto Division chuan nimin khan Ramhlun North, Aizawla an showroom-ah Yamaha R3 BS6 an pho chhuak.

December 15, 2023 khan YouTube kaltlangin India ramah Yamaha motorcycle hriat hlawh tak hi tlangzarh a ni tawh a, ni 46 hnuah Mizoramah khuh hawng ve lehin India hmarchhak dealer zinga hralh tam ber an ni nghal. R3 chhuak thar hi Indonesia-a an siam sa, a ngai anga India ramah lak luh a ni a, a man pawh a to phah niin an sawi.

Mizoramah Rs . 4,97,114-in an hralh a, mi parukin an lei nghal. Tlangzarh ni hian mi pathumin an book ve leh nghal bawk. Lei tur tur tam dana zira lak chhuah a ni a, chah hun chhung hi ni 45 vel a ngai. Thansanga & Sons Auto Division enkawltu Robert Lalremruata chuan, "Hralh tam vak chi a ni lo va, hralh ṭhat erawh kan inring. US velah an fak em a, sports bike ngaina tak tak duhthusam phuhru thei tura beisei a ni," a ti.