Vanglaini Bihchianna Entrepreneur huang : Lawm from the hills

Skincare product lam siamtu Lawm from the hills chu Vanglaini chuan a bihchiang a, anni hian Mizoram boruak leh Mizo-te vun mil tura uluk taka duangin, mipuite hman tlanglawn leh mamawhte an rawn chhawpchhuak a ni.

Bul ṭan dan:

Kum 2021 khan Puipuii Hmar chuan Lawm from the hills hi dinin, 'Fai' tih hmingin facewash an siam hmasa ber a ni. A bul ṭan dan sawiin, "Covid avangin zin chhuah a har a, manufacturer-te nen en dun theih a nih loh avangin product duh ang a chhuah hma chu kan inthawn kual a, facewash ringawt pawh hi formulation sawi fel hnuah vawi 7 vel kan thlak danglam. Duhthusam a nih hma chu kan product-te hi siam ṭhain, result ṭha tak an neih nan kan test reng a ni. Chutiang bawkin kan product 2-na, sunscreen pawh hi kan uluk a, manufacturer-te nen final product kan tihfel hnuah, Spf 50+ a nihna pawh hi Laboratory dangah test kan nei leh vek a ni," a ti.

An brand launch hi online veka tiin, Instagram leh Whatsapp hi an hmang ṭangkai hle. An instagram page, @lawm.fromthehills leh whatsapp group hrang hrang (a bikin Zonuworkwear group) kaltlangin mi hriat leh dawr an hlawh chho a, "Kan launch aṭanga tun thlengin min puitu leh min hlutpuitu an tam em em a, Mizo zinga skincare leh make-up zuar leh eichawp dawr neite thleng hian kan product-te hi min zawrhpui nasa a, kan hlawkpui em em a ni," tiin Vanglaini a hrilh.

An thil tum:

Skincare leh Beauty industry-ah khawvel mai ni lo India ramah pawh brands an tam tawh a, manufacturer-te'n product siam chhuah an awlsam tawh avangin chi hrang a chhuak zung zung a, lei ber tur hriatthiam a har ṭhin.

Hei hi hriain, Lawm from the hills chuan mi nawlpuiin skincare kan hman hnem ber leh ni tin vun mamawh product chhawpchhuah a tum. Mizoram aṭanga thar chhuah hmang ngeia siam pawh an duh a, mahse, manpower, skill, leh infrastructure-te duhthusam a la awm loh avangin ingredient aṭangin bul an ṭan phawt. Tunah hian Mizorama walnut (khawkherh) oil, perilla (chhawhchhi) oil bakah Saisiak leh anchiri tui (hydrosol) hmangin an product-te hi an siam.

Hnathawktu:

Lawm from the hills hian thawktu, fulltime-in mi pahnih leh part time-in mi pakhat a nei mek. Thawktute hian sales & operations, accounting leh social media marketing-te an khawih a ni.

Thil siam leh zawrh chhuah dan:

Tunah hian product pathum - facewash, face oil leh sunscreen te an nei. Hengte hi wholesale-a an pek chhuah bakah, direct-in Instagram, an website leh Amazon aṭangin an hralh chhuak bawk. Mizoram pawnah pawh wholesale-a la leh, direct-a thawnna pawh an nei bawk a ni.

Hmachhawp:

Tun thla hian Lip Gloss Spf tel leh Perilla (chhawhchhi) oil, hmai mawm tana hman chi an rawn chhawpchhuak dawn. Hei bakah mi hman tam ber pawl, moisturiser pawh neih thuai an tum bawk.

Mizoram pawn lamah inzarpharh a, popup stall neih chhoh an tum. Hemi atan hian March 1-3 chhung hian Thelilflea, National Stadium, Delhi-ah stall an nei dawn. India rama beauty brand hriat hlawh zingah la tel ve ngei tuma ṭan lak an tum a ni.

Harsatna tawhte:

Mizoram aṭang chuan logistics, bungrua thawn chhuah leh lak luh lam a muan bakah a to bik ṭhin avangin, tum anga awm loh chang a awm fo thu Puipuii chuan a sawi. A bakah chuan startup nih anga buaina leh harsatna tawn zeuh zeuh chu awm mah se, Pathian zarah an hmachhawn ve thei zel tih a sawi.

Entrepreneurship (kutkawih eizawnna) chungchang:

"Entrepreneurship hi Mizote zingah a lar chho tawh a, lawmawm ka ti hle. Kan ram tihausa tur chuan entrepreneurship hi kan chawikan a ngai hle. Kan Mizopuite thiltih leh siam hi inhlutsak thiam a pawimawh a, Mizo tih leh siam a nih vanga hlut tak tak an tam laiin, chumi anih vanga hlauh leh ngaihṭhat lohna hi a awm thin bawk. Startup eng pawh a ṭha lama kan ṭhan zel nan, constructive criticism lam in pekte uar a ṭha hle.

Entrepreneurship luhchilh tur chuan kan tumah chian a, insiamrem thiamte a ngai. A result hmuh thut a har a,result ṭha/goals kan set kan achieve pawhin, hmachhawp a la awm zel avangin tuipui leh atchilh hi a ngai ka ti. Mahnia kal theih chin hi a awm a, kan ṭhan nasat poh leh puitu kan mamawh ṭhin. Lawm from the hills pawh hi tuna kan team leh a hmaa min lo pui tute tel lo chuan hetiang hi kan thleng thei lo ang. Team ṭha tak, a neitu ang hiala awm thei neiha din hi startup hlawhtling tur chuan a pawimawh bawk ka ti."