YouTube-in 'celebrity ads' video 1,000 chuang paih

YouTube chuan AI technology hmanga siam, scam ad video 1,000 chuang an delete tih a sawi.

404 Media-in a chhui hnuah, YouTube chuan mi lar - Taylor Swift, Steve Harvey, Joe Rogan leh midangte hmanga Medicare promote-na video hi an paih tih sawiin, heng video-te hi AI hmanga siam an ni. Video an paih takte hian view mtd. 200 vel an nei hman. YouTube user leh celebrities-te aṭang hian complaint an dawng a ni.

Tun thla tir lam khan YouTube chuan AI-generated content-te lakah action lak zel a tum thu hi a lo sawi tawh a, hemi atan hian harassment leh cyberbulling policy-te pawh a siam ṭha a ni. He policy zawm lote chu remove zel an nih tur thu leh, creator-te chu email hmanga hriattir an nih ṭhin tur thu an sawi.

Content creator ṭhenkhat chuan, AI technology hmang hian naupang bo emaw, thi tawh emaw ang deuhte rawn siamin, an chanchinte an rawn sawitir ṭhin niin report ṭhenkhat chuan an tarlang.

Cybersecurity firm, Deeptrace chuan YouTube bakah online platform hrang hrangah video siam chawp, deepfake content hi a hluar chho hle tih sawiin, a bikin milar hmeichhiate'n an tuar nasa. Deepfake tam ber, 96% vel hi pornographic lam a ni bawk.