SEVENTEEN photocard vangin blood donor an pung

Korean Red Cross chuan thisen petute an pun theihna atan an rama mi lar, k-pop band SEVENTEEN chu hman ṭangkai dan an ngaihtuah a, result ṭha tak an neih phah bawk.

Kumin January 12 aṭang khan Seoul Southern Blood Centre hnuaia centre 13-te chuan thisen petute hnenah SEVENTEEN photocard an lo sem zel a, hamburger-te an lo pe tel bawk. He thil hian nghawng ṭha tak neiin, photocard an sem chhuah hnu hian nikum hemi hun chhung nena khaikhinin, thisen petu hi 68.6% zetin a pung. Thisen petu tam ber hi teenager leh 20's te niin, thisen petu zinga 81.7% an tling. Korean Red Cross chuan SEVENTEEN photocard hi a tirah 1,000 chauh an lo buatsaih a, mahse, thisen pe an tam tak avangin an order belh leh nual tih an sawi.