Box Office: 'The Beekeeper' leh 'Mean Girls' inum zel

North American box office-ah thawm rawn nei lian thar an awm lo a, 'The Beekeeper' leh 'Mean Girls (2024)' an la inum zel.

Jason Statham channa, action thriller 'The Beekeeper' hian a kar thumnaah USD mtd 7.4 lak luh belhin, USD mtd 7.3 la luttu 'Mean Girls (2024)' a lehpel thei hram. An inthlauhna hi USD 200k pawh a tling pha lo. 'The Beekeeper' hian domestic-ah USD mtd 42.3 la lut tawhin, khawvel huapa a sum lak luh hi USD mtd 100 chuang a tling tawh.

Kar hnih chhung a chung ber dinhmun a hauh hnuah 'Mean Girs (2024)' chu No 2-ah a tla thla a, domestic-ah a sum hmuh hi USD 60.8 a tling tawh a ni. NO 3-ah 'Wonka' a la awm chhunzawm zel a, kar hmasa lam aiin ticket sales 12% in a tlahniam tawh a, USD mtd 5.9 la lut lehin, khawvel puma a sum hmuh hi USD mtd 552.1 a kai tawh a ni.

"Migration" leh "Anyone But You" pawhin an dinhmun ngai, No 4 leh 5 an luah chhunzawm. Universal leh Illumination animation hian ram chhungah USD mtd 5.2 a hmuh belh leh a, R-rated romantic comedy hian USD mtd 4.8 a lak luh belh leh bawk.