AC/DC 'Back in Black' MV-in 1 billion view nei tling ta

Australian rock band, kum 1973 daih tawha din, AC/DC chu an thawm a la reh mai lo a, YouTube lamah kum 1980-a an lo hit-pui tawh, 'Back in Black' music video chu 1 billion view an rawn neihpui ve leh.

'Back in Black' official video hi kum 2012, November thla khan YouTube-ah hian an dah a ni. He hla hi kum 1980, February thlaa boruak, an singer hlui Bon Scott hriatrengna atana an siam a ni. A track hi movie leh TV show hrang hrangah pawh an lo hmang tawh hlawm a, heng zingah hian “Iron Man,” “Megamind,” “Spider-Man: Far From Home,” “Family Guy” leh “Supernatural.” pawh an tel. AC/DC hian an hla dang, “Thunderstruck” chu kum 2021 khan 1 billion view an lo neihpui tawh bawk.

YouTube-ah hian 1980's hla, billion view nei tling an awm nual tawh a, heng zingah hian George Michael 'Careless Whisper', Guns N' Roses 'Sweet Child O' Mine', A-ha 'Take On Me', Michael Jackson 'Billie Jean', Rick Astley 'Never Gonna Give You Up', Cyndi Lauper 'Girls Just Want to Have Fun ', Europe 'The Final Countdown' leh the Police 'Every Breath You Take' te an tel.