Lersia Play Top Chart : January-ah 'Rini leh Rina' hralh hnem ber

Lersia Play-in kumin January thla chhunga an app kaltlanga an film hralh chhuah hnem ber chu 'Rini leh Rina' a ni.

In-House Production kutchhuak, 'Rini leh Rina' hi January 19 khan tlangzarh niin, Lersia Play-ah dah nghal a ni a, thla chanve hnu lama dah chauh ni mah se hemi thla chhunga hralh hnem ber a rawn ni thei nghal a ni. He film hi In-House Production feature film pangana a ni a, Drew Pachuau chu director leh director of photography a ni a, script writer, Samuel L Pachuau niin, Lailen Consulting Pvt. Ltd.chu co-producer a ni. Nula tlangval inngaihzawnna lam niin, film lama tawnhriat nei ṭha leh hriat lar - Lalruatsangi (Sangsangi), Francis Malsawmdawngkima, Esther Zongte leh Alli Sandra Lalrinhlui te an chang.

January thla chhunga film hralh hnem pahnihna chu 'Keimi' a ni. He film hi Mizo pipute thawnthu behchhanin, a ennawm thei ang zawnga siam a ni. December 2, 2023 khan tlangzarhin, show anga an kalpui hnuah December 28-ah Lersia Play-a hian dah a ni. Christo Pa direct niin, a thawnthu hi Christo Pa, Dawm Pachuau leh Aba Hmar te ziah a ni a, B Lego Picture kutchhuak a ni. A changtute hi Tlangpui nula Zonuni leh Khawhai tlangval Zova te an ni.

Nikum December thlaa hralh hnem ber, 'Tleitiri' chu January thlaa film hralh hnem pathumna a la ni pha. Nikum December 19-ah tlangzarhin Lersia App-ah dah a ni. Director hi Mapuia (M Jay Pictures) niin, producer leh story writer hi JS Tharmawii a ni. Ms Smiley leh Marilyn Chhanchhani te an chang. January-a film hralh hnem zual panga zingah hian Joel Chhakchhuak direct leh ziah, 'Khuarkhurum' leh Leitlang Pictures kutchhuak 'Ambush' te an la lang bawk.