Khiangte Construction Ṭhazual : GOSPEL No. 1-ah Arini Ralte 'Hei chauh ka dil'

Khiangte Construction Ṭhazual Gospel chart tharah a zaithiamzia sawi nawn ngai lo, Mizo gospel artist kan neih ṭhat ber zinga mi Arini Ralte chuan 'Hei chauh ka dil' tih chu no. 1 a rawn nihpui.

'Hei chauh ka dil' hi tun hnaia Kristian movie chhuak thar, 'Gabriel' OST niin, a hla hi sap hla aṭanga lehlin a ni. Recording hi Zta Khawlhring kutchhuak niin, video hi Moonshine Studio siam a ni a, nikum December 5 khan YouTube-ah dah chhuah a ni. Pathian chu a hnena cheng a, a nun leh hunte Ama ropuina atana hmang tura sawmna niin, hun harsa karah Pathian chu kan chakna leh kan phaw a ni tih puanchhuahna a ni. 'Gabriel' film-ah hian natnain mi pahnih hringnun a tihbuai leh, harsatna an hmachhawn dante pho lan a ni a, hemi mil zet hian a OST pawh hi lungkuai leh rilru hneh takin Arini hian a rawn sa chhuak a ni.

Chart-a pahnihna hi Faktu 'Hruai zel ang che' niin,Faktu member-te hi mimal pawha kan lo hriat lar vek tawh - RK Vanlalpeksanga (Mapeka), JH Lallungmuana (Jh-a), B. Lalbiakkima (Bka), Lalremsanga (Betea) leh Sangzuala Chhangte te an ni. Hla ṭha tak tak an la rawn neih chhoh zel beisei ang. Lalthlengliani Jongte 'Ka ralven buk' chu pathumnaah rawn chhoin, Stacy VL Muanpuii hla thar 'Ka chhungkua' chu palinaah a lang a, Top 5 hi Mama Khiangte chuan 'Kan ngai tawh lo'ng' tiin a rawn khar.

Ṭhazual Gospel Top 10-ah hian Lalfakzuali leh The B4 te an la lang chhunzawm a, hetih lai hian One in Christ, Lalfakawmi (Mafaki) leh Esther Khiangte te chu an rawn lang thar thung.