Grammy Awards 2024-ah hmeichhia an che ṭha

66th annual Grammy Awards chu Pathianni zan khan Los Angeles,California-a Crypto.com Arena-ah neih niin hmeichhe lam an che ṭha zawk.

Taylor Swift chuan 'Midnights' chu album of the year award lakpuiin, artist zingah he award vawi li la thei awmchhun a ni. Best album award hi Stevie Wonder, Paul Simon leh Frank Sinatra-te chuan vawi thum ṭheuh an lo dawng tawh a, Swift hian a rawn khum ta a ni. Award hi Celine Dion hnen aṭangin a dawng a,album thar a tihchhuah hun tur a puang zui bawk.

Pathianni zana Los Angeles show-ah hian R&B star SZA leh Victoria Monét bakah, all-female indie supergroup Boygenius chuan award eng emaw zat dawngin, music icon Tracy Chapman leh Joni Mitchell-te ropui takin an perform bawk.

Mipa lamah Killer Mike che ṭha berin, award pathum a hawn. Mahse backstage lamah a che mawi lo zui a, security guard kutthlaka puh a nih avangin thubuai siamsak zui a ni.

Kuminah hian category pathum - Best African Music Performance, Best Alternative Jazz Album leh Best Pop Dance Recording siam belh a ni a, hengte hi Tyla 'Water', Meshell Ndegeocello 'The Omnichord Real Book' leh Padam Padam te'n an dawng.