Kar thum hnuah pawh Taylor Swift 'Folklore' bawk

Taylor Swift chuan a album thar 'Folklore' chu a hlawhtlinpui chhunzawm zel a, Billboard 200 chart-ah a zawnin kar thum chhung album hralh tam ber a ni ta a, khum thei an la awm lo a ni.

Rapper fam ta Juice WRLD album 'Legends Never Die' chu pahnihnaah a rawn inhlangkai ve leh a, Pop Smoke  'Shoot For The Stars Aim For The Moon' chu pathumna a ni thung.

Taylor Swift  studio album pariatna 'Folklore' chu a zawnin kar thum chhung US-a album hralh kal ber a ni ta a, kar liam ta chhung khan 1,36,000 equivalent album unit a la hmu chhuak tho niin Nielsen Music/MRC Data chuan a tarlang a, tlangzarh a nih karah khan  8,46,000 unit a hmu chhuak bawk a ni.

Swift ropuina hi belhchhahin a awm zel a, Billboard Hot 100-ah pawh a album thara mi hla pathum ngawt a lang a, 'Cardigan' chu No. 24 a ni a, 'The 1' chu 50-na ni bawkin Bon Iver nena an sak dun 'Exile' chu 61-na a ni bawk.

Top Artist tu emawin album a tlangzarh thar a nih loh chuan Taylor Swift hian a dinhmun hi a luahlum deuh reng hrih mai thei a, chutih rual erawh chuan thla tawpah hian Katy Perry chuan a album thar 'Smile' a tlangzarh dawn a, John Mayer 'ex'-te pahnih hi music khawvelah pawh an inel chho leh dawn niin a lang.

Nikum kum tawpa boral ta Juice WRLD album 'Legend Never Die' chu kar hmasa khan pathumna a ni a, tunah erawh pa­hnihnaah a rawn inhlangkai leh ta a ni.

Pop Smoke  'Shoot For The Stars Aim For The Moon' chu pahnihna aṭangin pathumnaah a tlahniam ve thung a,  Rod Wave 'Pray 4 Love' chu palina niin Luke Bryan 'Born Here Live Here Die Here' chu chart-ah inlan tharin pangana a ni nghal.

Luke Bryan bakah hian Glass Animals leh NLE Choppa-te chu Top 10-ah an rawn inlan thar bawk.

Original Broadway Cast  'Hamilton: An American Mu­sical' chu kar 255 chung lai Billboard 200 chart-ah a lang tawh.  'Hamilton: An American Musical' hi February 17, 2015 khan premiere a ni a, kum 2016 khan Pulitzer Prize for Drama-te hial pawh a lo dawng tawh a, Billboard chart-ah hian a lang rei tawh hle a ni.

1    Folklore    Taylor Swift

2    Legends Never Die    Juice WRLD

3    Shoot For The Stars Aim For The Moon    Pop Smoke

4    Pray 4 Love    Rod Wave

5    Born Here Live Here Die Here    Luke Bryan

6    Hamilton: An American Musical    Original Broadway Cast

7    Dreamland    Glass Animals

8    BLAME IT ON BABY    DaBaby

9    My Turn    Lil Baby

10    Top Shotta    NLE Choppa