Box Office : No. 1 'Argylle' thawm a na lo

North American box office-ah kar liam ta khan elpui lian tham an awm lo bawk a, thawm na lo tak chungin spy action comedy, 'Argylle' chu no. 1-ah a rawn lang.

Kar liam ta chhungin film chhuak thar langsar tak an awm lo a, box office lam boruak pawh a dai viau. USD mtd. 200-250 budget hmanga siam, 'Argylle' hi tlangzarh karah beisei a pha lo hle a, theater 3,605-ah tihchhuah a ni chungin a sum lak luh hi USD tld. 18 vel chauh a tling. Ram pawn lamah pawh a che ṭha lutuk lo a, market 78 aṭangin USD 17.3 vel a hmu chhuak. Director Matthew Vaughn-a film thar hi critics lam pawhin an fak vak lo a, Rotten Tomatoes-ah 35% rating chauh hmu phain, CinemaScore-ah pawh audience lamin C+ grade an pe.

Christian drama series, "The Chosen: S4 Episode 1-3" chu no. 2-ah rawn langin, fourth season episode pathumte hi theatre 2,263-ah tichhuakin, USD mtd. 6 a la lut.

'The Beekeeper' chuan a kar thumnaah USD mtd. 5.3 lak luh belhin no. 3-ah tla thla a, no. 1 dinhmun lo hauh tawhtu, 'Mean Girls (2024)' chu no. 6-ah a tlahniam tawh bawk. 'Wonka' chu no. 4-ah langin, USD mtd. 4.7 a hmuh belh a, USD mtd. 4.1 la luttu, 'Migration' chu no. 5-ah a lang bawk.