The Rock-a fanuin vau a tawk

Dwayne 'The Rock' Johnson fanu, Ava chuan tun hnaia a pa WWE lama a kir hnuah thaha vauna a tawk niin a sawi.

A hming tak, Simone Garcia Johnson, Ava tia hriat lar hi a pa hnung zuiin wrestler a ni. A pa chungchang avangin vau a tawh thu hi X-ah rawn sawiin, a inhnamhnawihna tel ve lo thila vau tawh lo turin a ti zui bawk. The Rock hi WWE lamah kirin, kar liam ta khan 'SmackDown'-ah Roman Reigns nen an inbei. WWE lama a kir hi sawiseltu awm mah se, a fan tam zawkte an lawm hle a, The Rock leh Roman hi April thlaa WrestleMania-ah an inhmachhawn an beisei thute an sawi. Hei hi a thleng dik a nih chuan, The Rock hian January thlaa Royal Rumble-a hnehna changtu, Cody Rhodes a thlak dawn a, hei hi mi tam takin an duh lo thung.