Sushant Singh Rajput thihna thubuai SC-in chhui turin CBI a ti

June 14-a a chenna ina inawkhluma hmuh Bollywood superstar Sushant Singh Rajput thihna thubuai kalzelah  Supreme Court chuan nimin khan thupek tichhuak turin Sushant Singh Rajput thih dan chungchang chhui hna chu Central Bureau of Investigation (CBI) kutah a hlan.

Supreme Court hian Sushant Singh-a fan-te'n an rinhlelh rawn Mumbai police-te chu an evidence neih ang angte pawh CBI kutah hian hlan turin a ti a, Sushant Singh-a pa 'complaint' thehluh behchhana Bihar-a FIR ziah luh pawh chu thil dik a ni tih tarlangin, Bihar chuan CBI chhui tura ngen theihna an neih thu an tarlang bawk.

Sushant Singh thihdanah hian sawi neuh neuh a tam a, a fan-te leh Bollywood star dangte chuan 'nepotism' chungchang auchhuahpuiin, dem tur an zawng nasa a, Sushant pawh hi thah ngei a nih rin nghet an tam hle. Hemi chungchangah hian a ngaihzawng  Rhea Chakraborty pawh a bang bik lo a ni.

Mumbai police-te chuan Sushant Singh hi mahni intihlumah an puang a, an chhuizuinaah pawh depression a neih thu leh film industry insider-te chuan an enhrang nia a inngaih thute pawh an lo sawi tawh. Mahse Mumbai police-te hmalak dan hrang hrang chik taka lo thlirtute chuan mahni intihlum a nih hi an pawm thei lo a, thil eng emaw police-te hian zep ruk an nei niin an ngai a, hemi a nih avang hian boruak pawh a dai thei meuh lo.

Sushant Singh Rajput pa KK Singh chu a fapa thih aṭanga thla khat aia tam a ral hnuah a rilru a dam thei ngang lo a niang, Rhea Chakraborty leh a chhungte lakah thubuai thehlutin a fapa chu sum chungchanga bumah leh rilru tihbuai sakah a puh a ni.

Bihar Police-te chuan hei hi la thutak zuiin CBI leh Enforcement Directorate-te hial an inrawlh a ngai ta a ni. Mahse Rhea Chakraborty hian SC hnenah Bihar case CBI kuta hlan tak chu Mumbai-a sawn a dil leh a, mahse SC lam pawh hian CBI kutah a hlan ta zawk a, Sushant Singh-a chhungte leh a fan-te chuan an beisei rorelna dik chu an hmu thei tawh turah ngai ang.

Kum 34 mi Sushant Singh Rajput kha Bollywood-a hmabak nei eng ber zinga mi niin a hming pawh a chher chho hle hman a, a thihna pawh hian Bollywood industry a chawk buai a ni. SC-in thupek an tihchhuah hnu lawk hian Sushant Singh-a farnu Shweta Singh Kirti chuan tweeter-ah, "Lalpa ka lawm e! Kan ṭawngṭaina i chhang a ni!! Mahse a bulṭanna chauh a ni...thudik lanna tura pen khatna chiah a ni!CBI-ah rinna pumhlum ka nghat!!," tiin a ziak nghe nghe.