'Death By Rock And Roll' Tihkhawtlai chhan Taylor Momsen-in a sawi

The Pretty Reckless singer Taylor Momsen chuan Forbes-in an kawmnaah album tlangzarh mai an tum 'Death By Rock And Roll' nakkuma tlangzarh tura an sawn hlat leh chhan a sawi.

"Keini pawhin 'Death By Rock And Roll' tihkhawtlai tur chungchang hi hun rei tak kan ngaihtuah ho a, keimah ngei pawhin tihkawhtlai ka duh lo. Khawvelin rimawi a mamawh a, rimawi hian damna a thlen thei a, ka nunna pawh a chhanhim a ni. Hla kan tichhuak a, mi nunah hlimna a thlen dawn a nih chuan a ṭha kan ti khawp mai.

"Mahse tun hun hi hun harsa a ni a, chumi avang chuan thil awmdan thlir zelin hma kan la bek bek a ni. Album tihchhuah a nih hma pawh hian single tam zawk tihchhuah kan tum ngei e. Album kan tihkhawtlai chhan ber erawh hla kan tichhuak ve si anga, mi hmaah kan play leh theih dawn si loh vang hi a ni. Chu chu a chhan pakhat a ni, album tihchhuah ve lema tour theih loh chu a mak dawn hle a ni," tiin a sawi.

Rock music ngaihnatute'n an nghahhleh 'Death By Rock And Roll' album hi US-ah chuan 'Fearless Records' kaltlangin an tlangzarh dawn a, khawvel hmundangah erawh 'Century Media Records' kaltlangin an tlangzarh thung ang. He album-ah hian Tom Morello leh Matt Cameron-te pawh an thawhpui a ni.