2024 Mobo Awards : Central Cee-in Award ngaihhlut pahnih la

Black music leh culture lama che ṭha leh thawh hlawkte hnena kumtina chawimawina hlan ṭhin, British music award, Mobo Awards 2024 sem a ni a; Central Cee chuan award ngaihhlut pahnih, Best Male Act leh Song of the Year a dawng.

Ceremony hi a ṭum khatna atan Sheffield-a Utility Arena-ah neih a ni a, 'Love Island' star Indiyah Polack leh comedian Babatunde Aleshe-ten an host. Award sem zanah hian Mobo Impact Award dawngtu Sugababes leh, Lifetime Achievement Award dawngtu Soul II Soul te ropui takin an peform. Anni bakah DJ Spoony, Ghetts, Cristale, Byron Messia, King Promise leh Camidoh-te an perform bawk.

Nomination pali ve ve hmu tu, Little Simz leh Stormzy-te chuan award pakhat ve ve, Best Hip-Hop Act leh Best Music Video an la. Award pahnih la tu, Central Cee hian Mobo history-a award la hnem ber record siam mektu, rapper Stormzy award lak zat a rawn nih rualpui thei ta.

Best Female Act dawngtu, kum 26 mi, singer-songwriter Raye hian Mobo award a lak ṭum khatna a ni a, BRIT Awards neih turah nomination pasarih zet hmuin record a siam. Award dawngtu pahnih, Raye leh Stormzy-te hi Australia lamah tour an neih mek avangin a hmunah award hi an dawng thei lo a, lawmthu sawina video an thawn chu play sak an ni ta zawk a ni.